استقعاد + استهبال + شوية رزالة على قول المصريين = ممكن اقصدك انت

عضو فعال عدد الرسائل : 80

سلام يا جماعة النص ½ (فاهم الربع غلط )

عجبكم العنوان؟؟؟

أكيد ما عجبكم...أصلا أنا ما عجبني

إستقعاد:

هذا يقولكم واحد من الأعضاء الله يستر عليه...
غثيييييث بالحيل
يدخل المنتدى كل عشر دقايق
مسوي فيها عضو فعال مع وجهه (ابد ما يتكلم عن نفسه الأخ)

المهم..ما اطول عليكم بالسالفة
دخل المنتدى وقعد يتصفح من صفحة لصفحة
لقى مواضيع حلوة ورد عليها

ثم فجأة...وإذا به يدخل المعرض (حق الصور مو معرض سيارات <IMG class=inlineimg title=">)
ويلقى قدامه موضوع جديد أول مرة يشوفه لعضو من كبارية المنتدى
والردود ما شاء الله تبارك الله عشرطعش رد

المسكين إنخبل
يقول: توي داخل المعرض ما شفت شيء
متى أمداه هالعضو الرهيب (مو تمصلح أبد ) ينزل موضوع ويردون عليه العالم

قال: خلني أشيك عليه..أكيد موضوع حلو

دخل أخونا في الله الموضوع وبدأ يقرأ
وإنسجم بالحيل مع الموضوع (يقعد يدندن: ترا رم رم..ترا ريم ريم..ترا روم روم)

وإذ فجأة ما لقى الصور
؟؟؟

وين راحت الصور؟؟؟
وين الصور؟؟

لاحول وش السالفة

طلع أخينا فوق يشوف تاريخ الموضوع
وإذ فجأة يكتشف إن الموضوع من سنة

وجع وجع وجع
وش جاب ذا الموضوع القديم هنا

أصلا من قدمه إختفت الصور فيه

همممم
يا ترى ليه يا متولي؟؟

قال في نفسه:
خلني أشوف الرد الأخير عشان تبان المسألة..

نقز للصفحة الأخيرة..ونزل بالصفحة إلى آخر رد
وإذ فجأة (اللي يعدون...ترى رابع مرة أقول وإذ فجأة ) إكتشف الرد التالي

اقتباس:

شكرا على الصور

وطبعا تاريخ الرد هو نفس اليوم...وقبل عشر دقايق بعد

طيب أي شكر...واي صور اللي يتكلم عنها هالعضو الموقر اللي مكلف على نفسه ومسجل ومسوي زحمة وآخرتها يرد على موضوع قديم إختفت الصور منه أساسا

لا ويقول شكرا على الصور

تستهبل يا حبيبي
أي صور اللي تتكلم عنها (مو قايل لكم إستقعاد لخلق الله)

بدأ يكلم نفسه:
يالله...خل الأعضاء يتونسون
وش حارق رزك أنت
وإلا تبي تستقعد يعني لخلق الله

فاصل ونواصل
قم ياللي قاعد تقرأ أو قومي الله لا يهينك...رح لم الثلاجة وجب لي كاس موية بارد إذا تبي تكمل الموضوع
وإذا ما تبي..قول لخدامتكم تجيب... عادي يعني

عدنا

إستهبال:

يقول لك كان فيه فيس إسمه خ
شوفوا صورته

كان دايم يفرفر في المنتديات
وهو سعيد مرة مرة بالحيل

والضحكة شاقة الوجه شق...بغت تجيب له أبو وجيه مدري وشسمه ذاك اللي يعفط الوجه
مثل الكنهل إذا خابرين ههههههه

المهم
خش خ لموضوع حلو في العام
وقرآه وهو مبسوط مرة

وبعد ما خلص حب يرد
وكتب رد حلو ودمه خفيف

وعشان يثبت خفة دمه الثقيل...حط صورته (ابد مو حركاتي دايم ههههههه)
وبعد الصورة كتب (هههههههههههههه)
عشان لا أحد يفهمه غلط
يمكن يفكرونه يهزأهم أو يحقرهم
وهو مو قصده والله

هو يبيهم يضحكون دايم مثله كذا

بعد يوم
رجع للموضوع
يبي يشوف وش كتب له صاحب الموضوع
وليته ما رجع
طلع اللي كاتب الموضوع هو العضو مولع (شوفوا صورته )

ولقى خ رد ما عجبه
مسكين خ..دايم مظلوم

طلع العضو مولع فاهم إستهبال خ غلط
يفكر إن خ المسكين يستخف فيه أو يقلل من قدره
وهو مو قصده والله أبد

طبعا هذا ما يمنع إن خ المبتسم للدنيا إنسان
ويزعل مثله مثل غيره لما أحد يجرح إحساسه

طبعا خ المسكين زعل زعلة شينة...
وصار له حول الشهرين ما طلع من بيتهم

وكل ما جو الشلة إفلقني وكركر و أبو ضروس و مبروك ولد مبارك ومعصب اللي قافلة معه دايم والخبل وناسة ولد إمام مسجدهم
يستحي خ يوريهم وجهه بعد الفشيلة والتهزيء اللي جاه من مولع الله يسامحه

وصار يطلع لهم أخوه الصغير
عشان يقولهم: أخوي نايم..ما يبي يلعب معاكم

طبعا شباب الحارة الكبار واثق وكاشخ وأبوشنب وأسعد عمر قللي ..ما عجبهم الوضع

ومن يومها وهم يحاولون يرضون خ باي طريقة ويطلعوه من وحدته الإختيارية

ويقولون والعهدة على دبوس الحارة إن خ جاه مرض نفسي وعضوي
وتغير وجهه من يومها
صار كذا المسكين

شوية رزالة:

ما مليت من قراية هالخرابيط اللي فوق

يعني بالله ما عندك شغلة غير إنك تقرا لواحد فاضي مثلي

خلصت أشغالك يعني...

قم أقعد مع أهلك شوي

سولف مع الوالد أو الوالدة

والله لو إنك متغرب كان بكل لحظة تتمنى لو ترجع عشان تسولف مع أهلك

I miss my family

خلاص خلص الموضوع
إقضب الباب من غير ما ترد
أصلا ما فيه داعي تضيع وقتي ووقتك
خصوصا إذا بتستهبل علي وتحط خ في ردك

ترى أجيب لك مولع يرد عليك

بايات
ترى الموضوع فضاوة آخر يوم قبل لا يبدأ الكرف

المهم لا أحد يفهم غلط ويفكرني أتكلم عنه

ولا أحد يزعل

والقصص كلها خيالية وماقد حصلت أبد

أصلا ما فيه شيء في الدنيا إسمه منتدى

وشهو المنتدى هذا...يمكن يخترعونه بعد كم سنة

طبعا انا ناقش الموضوع بالحرف والملي