يوميات شايب متقاعد)
( قعد ) ( يـقـعـد ) ( قـاعـد ) ( متـقـاعـد )
المتقاعد : مأخوذه من الفعل ( قعد ) أي جلس .... فأشتقت منها كلمة ( متقاعد ) ............
والمتقاعد هو ذلك الشخص غريب الاطوار ، كثير السرحان ، عمره عادة ً من الخمسة والخمسين وطالع ..ذو كرشة ًكبيرة مرهله ملخبطة ما تدري انت تناظر في كرش ولا في بطانيات،، .... يملك صوتا ً جهير ومزعج بالذات على عياله ، شعر أبيض يغزو رأسه ودقنه ، سريع الاشتعال والغضب لأتـفـه الاسباب وأصغرها ، يعشق الفك والتركيب ( لكن مع الاسف هم يفكون لكن يخربون معادوا يقدرون يرجعونة )
اذكر لكم في عجالة هذه الـقُصيصة ( تصغير قصة )
واحد من الشباب ابوه ( متقاعد ) يقولي : قد رجعت مره البيت وأدخل في المجلس الي كان فيه الكمبيوتر جيت إلا بوه فك الكمبيوتر إن عاد قطع الهاردسك بما حواء عاد في الأرض وإلا والله أن لصقة الضمان حقت الجهاز انه قد فكها و الصقها في الكنب حق المجلس ...... ف دخل عليه لية يابويه ... !!! قال أبوه : يارجال سمعت طنطنه فيه قلت وافكه واشوف وش فيه ....(صوت المودم )
طبعا الجهاز مارجع زي اول وداه الولد بقطعه المفككه وذهب للمهندس ورجعّه مثل ما كان واما الضمان فظفر فيه الكنب ...
فالشاهد انه فكه وقال انه ويصلحه و يبعد الصوت الي كان فية ( فكر انه الرادي حقه ) ولكن ماحصل الشي هذا .......
.................................................. .................................................. .................................................. .........................................
قام ابوسعد _الشايب العسكري المتقاعد _ يوم الخميس إللي هو اجازه عندعياله وعند عيال المسلمين .. ما تجي الساعه سبعه إلاهو صاحي زي الجني يلف رقبته يمين ويسار ثم يبدأ دماغه يرسل الاوامر لاطرافه ........ ثم ادخل اصبعه السبابه اليمنى في أذنه اليـمـنئ وبدأ بعملية التنقيب عن حشرة النـامس العالقة في شبكة الصيد المعدوده له مسبقا ......... طبعا كلكم بـتسألون عن شبكة الصيد هذه و وش جابها .. انا اقولكم .. الشبكة يا طوال الاعمار هو الشعر اللي تجمع في أذن ابـو سعد وصار كأنه ظـهـر قـنـفـذ ....... يستطلع النامس او النامسه ( النامسه = حرمت النامس ) يطلعهم من أذنه هي والنمل وجميع الحشرات العالقه من ليلة البارحه ونفس الحكايه مع اذنه الايسر ...... ثم يقوم ويخذ منشفته الي بجنبه ينشرها على اصابع ايده ثم يبدأ بعملية الشـهـيق المصاحبه بأصوات الحراشف والخشخشات الهوائية و الأصوات الكريهة من جراء تلك الشهقه إلى أن تمتلئ رئاته بالهواء ،،،، ثم يضع اصبعه السبابه اليسار في فتحت انفه اليسـرى من الخارج يسد بها مجرى الهواء ثم يقـوم بعملية الـزفيـرالمشهوره ذات بأس شديد فيخرج من هذه العملية جميع الشوائب والفراشات الليليه ( الي يجي على النجف واللمبات ) ويستمر ثاني اكسيد الكربون بالخروج ولا زالت عملية الإنزال المظلي من نخاع أبو سعد جاريه إلى أن ينتهي به المطاف بخروج آخر نسمه من غاز الأوكسجين + الماء H2O (بصوت واحد كلكم تكفون قـولوا: نعل الله الكيمياء..... فوالله ما نشب في نحري في اول ثانوي إلاهي )
ثـم يكرر العمليه لكن مع الفتحه اليمنى من الأنف المخدوش من جميع الجهات وفيه حبـة خـال مثل الفـوله .. ولما ينتهي من العمليه السابق ذكرها آنفا يفتح عيونه إلا فيها( غمص ) ام يأخذ منشفة ثانيه غير الاوله حقت أنفه ثم لفها في عيونه ثم قعد ينضف الغمص من اطراف عينه ثم يفتح عيونه للمره الاخيره ويحس انه صحصح وان راسه مصفي ثم يبتسم لانه شاف وجه في قزاز دولابه قدامه ..
ثم يلتفت يسار في الكومدينه ويحصل تركيبة أسنانه في طاسه عليها موية نار حق بطاريات السيارات الحارقةdanger ) ) يشتلها ثم يمسحها شويه في طرف السرير ويبعد اللحم اللي نشب فيها من عشا أمس ثم يغرقها في صحن عسل أ ليــــن تلمع ثم أدخلها في وسط ثمه إلا اسم الله عليه محلى الوجه،،
قام ابوسعد من فراشه واخذ شماغه ولبسه بطريقة همجية فوق راسه ومشى بشويش الساعه سبعه ونص والبيت كلهم نايمين ما يسمع إلا صوت الذبان من عند أذنه تقولون ددسن في طريق الحويه – المطار وراح ألين وقع في الصاله ومن هنا بدأت مأساة عياله،،،،،،،،
طبعا الكل يتسائل هل ابوسعد مطلق حرمته هل هي ميته هل هي منومه هل إلخ ...... سؤال يحك نفسه بنفسه ......(لان فيه نامس قرصة )
والجواب يا طوال الأعمار أن أبوسعد من يوم تقعد وهو يتفنن في تطفيشها وتطفيش عياله يعني قبل ما يتقعّد كانوا ينامون في غرفهم وباسم الله عليهم ... ومن تقعّد وضع الرادي عند رااسه والصوت يسمعه جارهم رقم 51 من ترتيب العمائر المجاوره لهم ،،،،،،،،،،،،،،،،
فعلشان كذا صارت تنام المسكينه في الصاله والا مع بناتها في غرفتهم وتخليه مع الرادي وإذاعة لندن .... وأم سعد ماهي بعجوزه توها في العقد الاول من سن اليأس يعني باقي تلبس تنوره وتتعطر بجفنشي يعني ماقد وصلت لمرحلة فقدان الذاكرة والنسيان والعميان ..................
واصل ابوسعد مشواره في بيته لين دخل الصاله ..
إلا التلفزون شغال والسوني مشبوك فيه والا المراكي مرميه في كل مكان وإلا كيس بروست مرمي بالعظام والخبز .... تمتم في داخله .. آآه لعنكم ربي ياهذا السلق .......
( اسم الأشـاره (هذا السلق ) يعود إلى عياله) وهم درجات على النحو التالي
مكة المكرمه 20 41
المدينة المنورة 26 39
الـريـ ....
اووووووه اسف اسف .... راح بالي على .. حسن كراني والعشماوي خويه حق نشرة الاخبار
مزح مزززززززززح
سعد الابن الكبر يليه مباشرة صـلاح ... فوزية .... فاطمة والأدلخ الصغير الاخيـر طارق ..
صارت الساعه ثمانية وابو سعد جوعان و وده يتقهوى وكمان يبغى يصحيهم في الوقت نفسه لكن بطريقة غير مباشره .... راح فتح دولاب من دواليب المطبخ وجمع القدور في دولاب واحد وصكه ثم فتحه مره ثانيه وبس فتحه إلا خبيطها على بلاط المطبخ نقزوا عياله عاد قلقلت روسهم في الجدران من الخوف ... يحزنون،،،،،،،،،،،،،،،،،،،
قامت ام سعد عرفت على طول مقصد بو سعد وهي عارفه انه بالعاني يوم فك القدور ولكن صبر جميل .......
قامت المسكينه غسلت وجهها وقامت سوت له الفطور والدله واخذت التمر والفناجيل وحطتها في صحن وراحت للصالة ... ابو سعد كان جالس يناظر ( مالك إلا هيفا ) وهو فااااااااغر شي يهوووول وبس دخلت ام سعد فقلب القناة على المـجـد على برنامج الجواب الكافي ولا كأنه شي كان ...
ام سعد : إني شفتك شفتك لكن رجعها والله ما أخاف الأ لا تطلع عيونك من راسك ..
ابو سعد : الله يجعل عيونك الفقع ....وشبكم ماتقومون زي المسلمين صار ضحى وانتوا نايمين،،،، ( يصرف الموضوع )
ام سعد : اتق الله يا مسلم ترى توها تسعه .. وتراهم ماناموا إلا بعد الفجر ..
ابوسعد : والله لا ودي انهم ناموا ..شوفي ما أجمل الصاله والله ان كأنهم القرود الي في الهدا..
ام سعد : هيا خلاص فكنا من الصياح ولا تصحيهم خلهم ينامون إلا الظهر فأنهم مانوو يفطرون ( قلب الام طيب فديتها )
ابوسعد
: قلعك الله انتي وعيالك ،،،شوفوا بو صالح جارنا وعياله والله انهم مع أبوهم مكان ما يسير ولا قالوا ليش ولا فتحوا ثمهم بحرف إلا كلمة حاضر يا بوي ..
ام سعد :
: انت تلومهم في بوهم ماهو يصيح عليهم زيك ولاهو ينقد عليهم ولا يشرهم قدام الناس ،،،،،،،،،،..
ابو سعد:
: ااايوه ااايوه .. وش باقي في أبو صالح ( جرب نار الغيره ) ........ طبعاً الشيطان هنا يلعب لعبته لكن ام سعد بنت رجال عرفت انه فاغر ما ينحكى معه في الامور هذه ثم راحت؟
ام سعد
: واسير ازهب الفطور احسن لي ...... فيوم وصلت عند باب الصاله عادت وتطلع قالت : ايوه هيا رجع الحين على العاريه الي قبل شوي .....
ابو سعد
: والله انها احلى منك ،،،،
ام سعد تدعي في نفسها (يالله يارب انك تصلحه )
جابت الفطور ام سعد وافطروا بدون صوت وقاعدين يتفرجون في فلم الافتراس في ادغال افريقيا ( حتى ذوقه عنف وقتل وقتيل )،،،،،،
اذن الظهر وقام ابوسعد مسك غرف النوم عياله من طرف وفي يده برميل بـويه فاااضي وبس دخل غرفة سعد وصلاح ثم رمى البرميل ألين يصقع في السقف ثم خبط في الأرض إلاهم يتقلبون في فرشهم تقولون مسكهم كهرب ( صوت خبيط البرميل كفيل بأنه يصحي فوزيه وفاطمه والأهبل طارق الصغير ) فيعني معاد له داعي يمر على باقي العنااابر (سجن ابو غريب )
صلو وخلصوا وقامت فوزيه تسوي الغداء وتساعدها فاطمه بالزلطه وسعد يحلق دقنه في مغسلة البيت وصـلاح يذاكر ياحليله ضعّيف طلع على اخواله ... واما طارق الصغير(طرووووقي ) قد علقه أبوه بفنيلته في الجدار و قاعد يسمّع له جدول الضرب والله يجعله يخطي في رقم
واما أمهم تكلم حليمه بنت عمها الي مـتـنـومـه في المستشفى ولا قد زارتها ...
زهبت فوزيه الغداء وقعد على السفرة ..
ابو سعد
: وين صلاح ليه ما يتغدا معنا..
ام سعد
: قاعد يذاكر يا حليله والله ما قد أكل لقمه من عشا امس .....
ابو سعد
:
أحسن عساه على ذا الحال وأردا ...
ام سعد
: وشرايك نتغدى اليوم والنفس راضيه ..
تدخل فوزيه وتقطع الحوار الي نوى يسلك طريق الخدمة ..
فوزيه
: يابابه
ابوسعد : نعم نعامه ترفسك ..
فوزيه
:أبي فلوس بنزل السوق اليوم ..
ابو سعد
: وش هوله تنزلين السوق،،،، ناقصين ملابس وقمايم،،،،
فوزيه
: أبي اشتري قماش وافصله علشان ملكة (غدير ) بنت عمي ..
ام سعد
: ايوااااه عطها فلوس ليش ترفض . وانا بعد العصر أبيك توديني المستشفى أزور ( حليمه )شفها في المستشفى لها اسبوع ولا زرتها،،،
ابو سعد
: هيا من كلمك ألحين أعطيها و الأ ما أعطيها ماهو بشغلك ..
ويدخل عرض للمره الثانيه ويقطع حدت التوتر لكن المره هذه مع طرووووقي الصغير وقال : يايبه
ابوسعد
: هاه وش عندك بعد ..
طروووقي
: حتى أنا أبي فلوس ..
ابو سعد
: تبي فلوس هاااه .. ماعليه يا راعي جدول الضرب ثلاثه في ثلاثه كـــم ؟
طرووقي
:
سبعه
ابو سعد
: قـم لعن الله أمك يالبعيد .......... ثم صفقه كف عند الله خبره إلا الرز مع ثمه انكب في الارض ثم انطلق بأسرع سرعه راح يبكي عند صلاح في الغرفه ....
رسالة إلى كل متقاعد يقرأ الموضوع هذا أو مر عليه ...
لا تعتقد أن تقعدك هو بداية لنهايتك لا يا عزيزي أنت غلطان إن كان تفكيرك كذا .. ولا يجي في بالك إنك صرت عاجز أو إنك إنسان عديم الفائدة .... أو عالة على مجتمعك أو عائلتك لا بالحلول البديلة راح تكسر كل هذه الحواجز وتمارس حياتك اليومية بشكل طبيعي ... وتذكر قول حبيبي رسول الله صلى الله عليه وسلم ( خيركم خيركم لأهله )
طبعا فوزيه ما راحت السوق علشان تكشخ في ملكة ( غدير ) وهي باقي تبكي إلى ألحين واما فاطمه فهي تشوف الحسره في عيون اختها الكبيبره واما صلاح فاخذ الاول على الصف لكن مع الاسف ما سمع كلمة مبروك ياولدي من أبـوه الاشعث الاغبر وسعد دخله عمـه عسكري في سلاح الصيانه في الطائف جندي اول والأدلخ الصغير طارق سكن عند خاله لانه يوم اخذ الشهاده إلاهو ساقط في الرياضيات بدرجات فضيعه فأخذها براسه وراح عند خاله خوف من أبـوه ....
واما المسكينة ام سعد فلا زالت مع ابوسعد تنتظر رحمة ربي ،،،،،
واما ابو سعد فما زااال كل يوم يقوم الساعه سبعه ونصف ويرمي القدور علشان يصحون والساعه ثمانيه وهو مسنتر عند هيفاء على الإل بي ســي ........... ويا قلب لا تحزن
الخـــلاصــة .......
الموضوع أعجبكم والا لا،،،،،،،،،،،،،،،،،،،،،،،،،،،،،،،،وسلامتكم
مع تحيات،،،،،،،،،،،،،،،،،،،،،،،،،،،،،،،،،، الداحم الخطر الداهم
الإثنين مايو 26, 2008 10:32 am
