وحشتيني ミ♥ღ
طَرْفِيْ سِهِيْرٍ وْقَلْبِي يِشْتِكِـيْ الفَرْقَـا
وِعْزُوْمِيَ امْسَتْ مِنِ العَبْرَاتِ مِنْهـدَّه
.
حِبْرِيْ دُمُوْعِيْ وأوْرَاقِـي بَهَـا غَرْقَـا
وِامّا القَلَمْ مِّنْ ضَحَايَا العِشْقْ بَاعِـدَّه
.
فِيْ غَيْبْةِ الخِلِّ غَابَـتْ نَغْمْـةِ الوَرْقَـا
حَتَّى القَمَرْ فِيْ غِيَابَكْ بَاهْـتٍ خَـدَّه
.
نَارِ البْعَادَ اوْسَمَتْ فِيْ مُهْجِتِىْ حَرْقَـا
مَا بَاحِ قَلْبِـيْ بِمَكْنُوْنَـهْ وَلا سَـدَّه
.
أَضْحَكْ واحَاوِلْ أَخَفِّيْ دَمْعِـةٍ زَرْقَـا
مَا كِنَّهَا الاّ بَحَرْ فِيْ جَـزْرَهُ وْمَـدَّه
.
كُلّ الدُّرُوْبَ اصْبَحَتْ فِيْ نَاظِرِيْ شَرْقَا
أَشُوْفِكِ الشَّمْسْ فِيْ رَوْحَتْكْ وِالـرَّدَّه
.
فِيْ مُزْنِ حُبِّكْ أَشُوْفِ الرَّعْدِ وِالْبَرْقَـا
بَسَّ انْتِظِرْ تِنْهِمِلْ عَـدَّى لَهَـا مِـدَّه
.
هَيَّا تَعَالِـيْ وَحَشْتِيْنِـيْ أَبِـيْ نِرْقَـا
هَامِ الفَرَحْ نِمْتِطِيْ صَهْوَتْـهْ وِنْشِـدَّه
.
آخِرْتَهَا طَالِبِـكْ لا تِطْـرِيِ الفَرْقَـا
مَانِيْ بِقَاوِيْ عَلَى الفَرْقَا وَلا الصَّـدَّه
إهــداء إلى ملكة قلبي (ل) ""ملكــة العــذااب""
** بقلم**
ساهر الطرف
السبت مايو 24, 2008 10:23 am
